विचाराधीन – प्रकाश सायमी 

यो समयकेवल मेरो हृदय जान्दछ

म किन घर फर्किन चाहन्छु ?
यतिबेला विस्तारपूर्वक

भन्नुको अर्थ

अझ अस्पष्ट हुन सक्छ
यतिबेला पछिल्लो वाक्यले

अघिल्ला वाक्यसित

कुनै मेल राख्दैन
भन्ने नै हो भने

यतिबेला

एकको संवेदनाले

अर्कोसित

सहानुभूति राख्दैन

म यसकारण

घर फर्किन चाहन्छु
यतिबेला म कमजोर छु

रुग्ण र नग्न भइरहेछु

तर

मसँग घरको सम्पूर्ण अर्थ छ

……जसरी सारा घर छोडेर गएकाहरु

फर्किन पाएनन्

हराए
घर बाहिरका सारा दृश्य नष्ट छन्

घरभित्र पनि सम्भवतः

नष्ट नै होलान्

तर पनि

म घर फर्किन चाहन्छु

जबकि त्यो मेरो गन्तव्य होइन

त्यहाँ मलाई पर्खिरहेका कोही छैनन्

यतिबेला

मेरो घर जत्ति सुरक्षित

यो देश पनि छैन ।