गाई  – शिवगोपाल रिसाल

गाई हाम्रो पशुधन, गोठको शोभा गाई

गाईजस्तो अरू छैन गाउँघरलाई

गाई पाल्ने देश हाम्रो गाईलाई मान्छ

वर्षैपिच्छे तिहारमा गाईको पूजा हुन्छ
घाँसपात, कुँडो, पराल, भुस्सा यसले खान्छ

अरूभन्दा तागतिलो दूध यसले दिन्छ

दूधबाट दही बन्छ, दहीबाट घिउ

दूध, दही, घिउ खाँदा राम्रो हुन्छ जीउ
घर लिप्न, चोख्याउन गोबर यसले दिन्छ

खेतबारीमा हाल्ने मल गोबरबाट बन्छ

मर्दा-पर्दा, धर्म गर्दा गौदान गाईकै हुन्छ

गुइँठो पारेपछि गोबर बाल्न पनि हुन्छ
गाईका काम धेरै हुन्छन्, कामधेनु गाई

गाई आमा पनि भन्छौँ हामी गाईलाई

हामी गाईको माया गर्छौँ गाईका धेरै गुन

यो राष्ट्रिय जनावर नेपालको धन

रमाइलो धर्ती – कृष्णप्रसाद पराजुली

हराभरा धर्ती राम्रो, नीलो आकाश राम्रो

घाम राम्रो, दिन राम्रो, जून पनि राम्रो

धर्तीभरि रमाइला कुरा धेरै हुन्छन्

पहाड, मैदान, खोलानाला, वनपाखा हुन्छन्
हिमालबाट तल झरी थरीथरी नदी

समुन्द्रमा मिल्न जान्छन् सललल बगी

ढुङ्गा हुन्छ, माटो हुन्छ, रूख यहीँ हुन्छ

जीवजन्तु सबको बास धर्तीमा नै हुन्छ
रमाइलो हिउँद-वर्षा घुमीफिरी आउँछ

फलफुल, अन्नपानी धर्ती उब्जाउँछ

धर्तीमा नै रहेका छन् सुन-तामाका खानी

राम्रो लाग्छ यही धर्ती, राम्रो घामपानी